Tërmeti me magnitudë 6.3, i cili goditi Shqipërinë më 26 nëntor 2019, la pas 51 viktima dhe së paku 913 persona të plagosur. Njëmbëdhjetë bashki në tre prefektura (Tiranë, Durrës dhe Lezhë), me një popullsi të përbërë mesatarisht nga 1,185,286 banorë, kanë vuajtur në shkallë të ndryshme pasojat e tërmetit, ku  202,291 persona janë prekur drejtpërsëdrejti ose tërthorazi. Sipas burimeve të qeverisë, rreth 17,090 banorë të prekur duhet të evakuonin shtëpitë e tyre. Për herë të parë në historinë e kohëve të fundit, qeveria shpalli Gjendjen e Emergjencës Natyrore në të tre prefekturat e përmendura. Sipas zbulimeve të PDNA-së, efekti total i katastrofës në 11 bashkitë e prekura arrin shifrën e 985.1 milion EURO (121.21 miliard ALL). Pjesa më e madhe e dëmeve është regjistruar në sektorin e strehimit (78.5%), pasuar nga sektori prodhues (8.4%) dhe sektori i arsimit (7.5%).

Sipas PDNA-së , në 11 bashkitë e prekura, janë raportuar dëme në 321 institucione arsimore, duke përfshirë çerdhe, parashkollorë, shkolla fillore, shkolla të arsimit të mesëm, shkolla të arsimit dhe formimit profesional, shkolla të mesme dhe konvikte, të cilat përfaqësojnë 24% të të gjitha strukturave arsimore. Rreth 90% e institucioneve të dëmtuara janë publike. Bashkitë e Tiranës dhe të Durrësit kanë pjesën më të madhe të dëmeve, me 55% dhe 21% përkatësisht. Shkolla u dëmtuan edhe në bashkitë më të vogla si Vora, ku gjysma e të gjitha institucioneve u shkatërruan pjesërisht ose plotësisht. Për më tepër, 60% e shkollave të shkatërruara dhe të dëmtuara ndodhen në zonat rurale. Përveç infrastrukturës, tërmeti gjithashtu dëmtoi edhe asetet fizike, si mobilie, laboratorë, pajisje të TKI-së, biblioteka, libra mësimorë, dhe materiale të tjera shkollore. Infrastruktura fizike e strukturave arsimore, veçanërisht në zonat rurale, nuk  përmbush rregulloret aktuale të sigurisë dhe aksesueshmërisë.

Projekti do të ofrojë asistencë të shpejtë për të ndihmuar me restaurimin e strukturave arsimore në 5 komunitetet vendore të prekura nga tërmeti i vitit 2019 (Krujë, Durrës), për të siguruar që nxënësit të humbasin sa më pak nga shkolla dhe orët mësimore, dhe për të mundësuar normalizimin gradual të jetës së popullsisë së prekur në ato bashki, me prioritet kryesor arsimin.

Projekti do të udhëhiqet nga nëntë parime të angazhimit të parashikuara në Deklaratën e Qëllimit me rastin e Konferencës Ndërkombëtare të Donatorëve pas tërmetit, më 17 shkurt 2020 në Bruksel, që konsiston në: konsistencë, qartësi, pjesëmarrje, transparencë, llogaridhënie, barazi, efikasitet, reziliencë dhe qëndrueshmëri.

Për të siguruar konsistencë dhe qartësi, do të garantohet koordinimi me të gjitha ndërhyrjet kombëtare dhe ndërkombëtare, si edhe do të përcaktohen qartësisht marrëveshjet e  zbatimit, duke qartësuar për rrjedhojë rolet dhe përgjegjësitë e të gjithë aktorëve të përfshirë.

Nga ana tjetër, në të gjitha fazat e projektit, do të zbatohet një qasje me pjesëmarrje, dhe parimi kryesor do të jetë transparenca.